Liquiçá, 3 Agostu 2026
Prezidente Autoridade Munisipál Liquiçá lidera Serimónia Içar Bandeira Nasionál iha resintu Autoridade Munisipál Liquiçá, tuir Decreto do Governo n.º 5/2011, ne’ebé regula prosedimentu ofisiál kona-ba uza no hasae Bandeira Nasionál Repúblika Demokrátika Timor-Leste atu asegura respeitu ba símbolu soberania no identidade nasaun nian.
Serimónia ne’e hetan partisipasaun husi funsionáriu públiku no ajente Estadu sira hotu ne’ebé presta servisu iha Autoridade Munisipál Liquiçá. Partisipasaun iha Serimónia Içar Bandeira Nasionál ne’e obrigatória tuir lei, no funsionáriu sira ne’ebé la marka prezensa ho razaun la justifikadu bele hetan sansaun disiplinár tuir regulamentu ne’ebé vigora. Serimónia ida-ne’e importante atu hametin respeitu ba Símbolu Nasionál, habelar sentidu patriotizmu no haforsa responsabilidade funsionáriu sira iha hala’o sira-nia knaar ho di’ak.
Içar Bandeira Nasionál iha semana dahuluk fulan ne’e sai nu’udar momentu importante atu hametin espírito patriotizmu, nasionalizmu no responsabilidade funsionáriu públiku sira iha implementasaun programa Governu nian iha Munisípiu Liquiçá.
Iha nia diskursu, Prezidente Autoridade Munisipál Liquiçá hato’o orientasaun no mensajen importante ba funsionáriu públiku no ajente Estadu hotu atu kontinua hametin servisu ne’ebé profisionál, responsavel, transparente no ho disiplina aas. Nia subliña katak servisu públiku tenke hala’o ho integridade, pontualidade no kompromisu atu fó atendimentu ne’ebé di’ak liu ba komunidade.
Iha nia orientasaun ba funsionáriu no ajente Estadu sira, Prezidente Autoridade Munisipál Liquiçá bolu atensaun ba Administradór Postu Administrativu sira atu orienta Xefe Suku sira hodi kontrola atividade kultura, hanesan Koremetan, ne’ebé tenke hetan lisensa ka autorizasaun husi Autoridade Munisipál antes realiza. Serimónia no lisan kultura Timor-Leste mak patrimóniu nasional ida ne’ebé importante tebes no tenke preserva. Maibé, implementasaun festa kultura sira tenke hala’o ho matenek, responsabilidade no tuir regulamentu ne’ebé vigora, atu asegura katak atividade sira ne’e hala’o ho orden, respeita lei no la fó impaktu negativu ba komunidade. Prezidente mos hateten katak Autoridade Munisipál Liquiçá oras ne’e servisu hamutuk ho diresaun hotu atu prepara-an didi’ak ba prosesu implementasaun Poder Lokál, tanba programa ida-ne’e sai prioridade nasional ne’ebé presiza koordenasaun no preparasaun institusionál husi entidade hotu iha nível munisipál. Tanba ne’e, Gabinete Apoiu Tékniku sei kontinua hala’o vizita monitorizasaun ba diresaun servisu munisipál hotu, inklui Administrasaun Postu Administrativu sira, atu haree diretamente progresu implementasaun programa Governu nian, avalia prestasaun servisu, no asegura katak funsionáriu sira kumpre oras servisu ho disiplina no responsabilidade.
Aleinde ne’e, Prezidente Autoridade Munisipál Liquiçá fó mos orientasaun ba Diresaun Servisu Planeamentu no Dezenvolvimentu Integradu Munisipál (DSPDIM) no Programa Nasional Dezenvolvimentu Suku (PNDS) atu kontinua kontrola no asegura implementasaun projetu sira lao tuir planeamentu, garante kualidade konstrusaun, no remata tuir prazu no kondisaun kontratu sira ne’ebé iha.
Serimónia ida-ne’e partisipa husi Sekretáriu Munisipál na’in tolu, Diretór Servisu Munisipál sira, Diretór Delegasaun Teritoriál sira, Xefe Departamentu sira, membru Korpu Bombeiru Destakamentu Liquiçá, no funsionáriu públiku, ajente Estadu no funsionáriu kazuál hotu ne’ebé presta servisu iha Autoridade Munisipál Liquiçá.
______