SEMINÁR ESTUDU KOMPARATIVU KONA-BA “BOAS PRÁTIKA ENTRE POSTU ADMINISTRATIVU” REALIZA IHA POSTU ADMINISTRATIVU BAZARTETE
Liquica, 22 Jullu 2026 – Prezidenti Autoridade Munisipál Liquiçá, Sua Excelénsia Paulino Ribeiro, MPA, partisipa iha Seminár Estudu Komparativu kona-ba “Boas Prátika Entre Postu Administrativu”, ne’ebé envolve Administrador Postu Administrativu husi munisípiu 12 iha Timor-Leste. Atividade ne’e realiza iha Postu Administrativu Bazartete, Munisípiu Liquiçá.
Seminár ne’e organiza husi Ministériu Administrasaun Estatál (MAE) liu husi Diresaun-Jerál Simplifikasaun no Modernizasaun Administrasaun Lokál (DGSMAAL) no Diresaun-Jerál Desentralizasaun no Governu Lokál (DGDGL). Objetivu prinsipál mak atu fahe esperiénsia, aprende malu no promove boas prátika entre postu administrativu sira, hodi hasa’e kualidade servisu públiku no prepara prosesu Desentralizasaun Administrativa, inklui avaliasaun ne’ebé Komisaun AKM sei hala’o iha faze daruak.
Iha nia intervensaun, Prezidenti Autoridade Munisipál Liquiçá, S.E. Paulino Ribeiro, MPA, hato’o liafuan bem-vindu no agradese ba Ministériu Administrasaun Estatál tanba hili Postu Administrativu Bazartete nu’udar fatin realizasaun atividade importante ida ne’e. Nia hatete katak estudu komparativu ne’e sai oportunidade ida atu Administrador Postu Administrativu sira aprende malu, troka esperiénsia no adota prátika di’ak husi postu ida ba postu seluk.
Iha biban hanesan, Sua Excelénsia Ministru Administrasaun Estatál, Tomás do Rosário Cabral, husu ba Prezidenti Autoridade Munisipál sira atu kontinua konvoka reuniaun alargada ho Administrador Postu Administrativu sira kada fulan, atu hametin koordenasaun no amizade entre lideransa administrativu sira iha munisípiu. Ministru mós husu ba Administrador Postu Administrativu sira atu kontinua realiza reuniaun regular ho Xefe Suku sira no reforsa kontrolu ba uma aluga sira, tanba Administrador Postu no Xefe Suku mak lideransa ne’ebé besik liu ho komunidade
Atividade ne’e loke ofisialmente husi Diretor-Jerál Desentralizasaun no Governu Lokál, Sr. António A. Guterres, iha sesaun dader, no taka ofisialmente husi S.E. Ministru Administrasaun Estatál, Tomás do Rosário Cabral.Seminár la’o ho di’ak, tuir programa no atmosfera kolaborativa, ho partisipasaun ativa husi autoridade, Administrador Postu Administrativu,Komandante Esquarda Bazartete no funsionáriu sira.