𝐓𝐎𝐌𝐀𝐃𝐀 𝐃𝐄 𝐏𝐎𝐒𝐒𝐄 𝐃𝐈𝐑𝐄𝐓𝐎𝐑𝐄𝐒 𝐒𝐄𝐑𝐕𝐈𝐒𝐔 𝐌𝐔𝐍𝐈𝐒𝐈𝐏𝐀𝐋 𝐋𝐈𝐐𝐔𝐈𝐂̧𝐀

Liquiça, 19 Fevereiru 2026

Prezidente Autoridade Munisipál Liquiça, Sua Exelénsia “Paulino Ribeiro, MPA”, ofisialmente halo tomada de posse ba Diretóres Servisu Munisipál hamutuk lima, tuir baze legal ne’ebé estabelese husi Despacho Ministériu Administrasaun Estatál N.º 09/M–MAE/I/2026, loron 21 Janeiru 2026, kona-ba nomeasaun Diretóres Servisu Munisipál Liquiça, no mós Ordem Servisu N.º REF. A02/M–MAE/II/2-2026, loron 09 Fevereiru 2026, kona-ba tomada de posse ba dirijente foun sira iha Autoridade Munisipál.

Nomeasaun ne’e realiza husi Ministru Administrasaun Estatál, Sua Exelénsia Tomás do Rosário Cabral, ne’ebé fó kompeténsia ba Prezidente Autoridade Munisipál Liquiça atu ofisialmente fó posse ba Diretóres Servisu Munisipál sira, mak hanesan:

1. Servisu Munisipál Patrimóniu no Logístika

2. Servisu Munisipál Protesaun Sivíl no Jestaun Dezastre Naturais

3. Servisu Munisipál Planeamentu no Finansas

4. Servisu Munisipál Ajénsia Fiskalizasaun

5. Servisu Munisipál Jestaun Merkadu no Turizmu

Serimónia solene tomada de posse ne’e realiza iha Salaun Enkontro Autoridade Munisipál Liquiça, ho partisipasaun husi Sekretáriu Estadu Peskas, “Domingos da Conceição dos Santos “Mau-Caro”, reprezentante husi Ministériu Administrasaun Estatál, Sekretáriu Autoridade Munisipál, Administradór Postu Administrativu sira, Diretóres Servisu Munisipál, Diretóres Delegasaun sira, Amo quse Pároko Bazartete, funsionáriu sira no família husi empossadu sira.

Iha nia intervensaun, Prezidente Autoridade Munisipál Liquiça enfatiza katak nomeasaun no tomada de posse ne’e importante atu kontinua reforsa kapasidade instituisaun no hadi’a prestasaun servisu públiku ba komunidade. Nia husu ba diretór foun sira atu halo servisu ho espírito responsabilidade, lideransa di’ak, transparénsia no komitmentu atu fó atendimentu ne’ebé di’ak liu tan ba povu.

Iha okaziaun hanesan, Prezidente Autoridade Munisipál Liquiça mós fó apresiasaun aas ba diretór sesante sira, ne’ebé durante ne’e fó ona sira nia esforsu tomak, tempu, no dedikasaun atu lidera no jere servisu munisipál sira ho di’ak. Nia hateten katak kontribuisaun husi diretór sesante sira sai hanesan baze importante ida hodi hametin funsionamentu instituisaun no lori dezenvolvimentu ba munisípiu Liquiça. Tanba ne’e, Prezidente Autoridade Munisipál hateten obrigadu barak ba sira nia servisu no sakrifísiu, no hein katak esperiénsia no koñesimentu ne’ebé sira iha sei kontinua kontribui ba dezenvolvimentu rai-laran iha futuru.

Tomada de posse ida ne’e marka pasu importante ida iha esforsu Autoridade Munisipál Liquiça nian atu hametin governasaun lokál, hadi’a efisiénsia servisu públiku no garante atendimentu ne’ebé orientadu ba interese no bem-estar povu tomak.

https://www.facebook.com/portal.munisipal.liquica.2025#media_portalliquiçá