SERIMÓNIA HANDOVER MINI MERKADU IKAN IHA KAITEHU, SUCO MOTA ULUN
Liquiça, 17 Dezembru 2025
Presidente Autoridade Munisipál Liquiça, Sua Exelênsia Paulino Ribeiro, MPA, kuarta ne’e partisipa iha Serimónia Handover Mini Merkadu Ikan iha aldeia Kaitehu, Suco Mota Ulun, Postu Administrativu Bazartete, Munisípiu Liquiça.
Mini Merkadu Ikan ida ne’e konstrui bazeia ba Planu Atividade 2024/2025 husi Direção Geral Peskas, Aquikultura no Jestaun Rekursu (DG-PAGRA), liu husi Direção Nasional Peskas (DNP), nu’udar parte husi esforsu Governu atu hadia fasilidade no infraestrutura setor peskas iha nivel komunidade. Inisiativa ida ne’e hetan objetivu atu hasa’e produsaun peskas, aumenta rendimentu no hadia moris diak komunidade peskador lokál sira.
Iha diskursu iha serimónia handover, Presidente Autoridade Munisipál Liquiça, Paulino Ribeiro, MPA, hateten katak konstrusaun Mini Merkadu Ikan ida ne’e sai hanesan fasilidade importante tebes ba komunidade peskador sira iha Kaitehu no área sira iha redondeza. Merkadu ne’e bele fasilita vendedores ikan atu fa’an ikan fresku ho kualidade diak, iha kondisaun ne’ebé higiéniku no seguru, no mos promove dezenvolvimentu empreza peskas lokál sira iha Munisípiu Liquiça.
Presidente Autoridade Munisipál mos apresia no agradese apoiu husi Ministériu Agricultura no Peskas, liu husi DG-PAGRA no DNP, ne’ebé kontinua fó atensaun no apoiu ba setor peskas, hodi garante sustentabilidade rekursu tasi no hasa’e rendimentu komunidade peskador sira.
Iha momentu hanesan, Sekretáriu Estadu Peskas, Sua Exelénsia Sr. Domingos da Conceição dos Santos “Mau-Caro” mos halo distribuisaun ekipamentus processamentu peskas ba Autoridade Munisipál Liquiça, atu depois fahe ba grupu peskador sira ne’ebé sai hanesan benefisiáriu diretu.
Ekipamentus ne’ebé entrega kompostu hosi:
- Ice Maker unidade 1 hodi produz zelu;
- Raga ikan hamutuk unidade 10 hodi tau ikan atu fa’an;
- Coolbox unidade 5 atu uza ba grupu peskador sira.
Sekretáriu Estadu Peskas hateten katak distribuisaun ekipamentus ne’e sei ajuda komunidade peskador sira atu hadia prosesu no kualidade manuseamentu ikan, preserva freskura produtu peskas, no aumenta valor ekonómiku ikan iha merkadu lokál.
Sekretáriu Estadu Peskas hatutan mós katak, inisiativa ida ne’e faz parte husi esforsu Governu atu hadi’a ekonómia komunidade peskas sira, no mós atu apoia seguransa ai-han nasionál. Sua excelência sublinha: colaboração com PAM é importante para garantir sustentabilidade na gestão de infraestrutura que entrega.
“Imi husu kria kondisaun, ami prontu konstrui fatin ne’e hodi bele fasilita imi-nia atividade negósiu, tanba ne’e ha’u ejize imi-nia responsabilidade hodi kontinua kuidadu para bele utiliza ba tempu naruk.”
Serimónia handover Mini Merkadu Ikan ida ne’e mós hetan partisipasaun husi lideransa lokál, xefe suku, grupu peskador sira, funsionáriu tékniku husi setor peskas, no komunidade iha Kaitehu, Suco Mota Ulun. Partisipante sira hotu hatudu kontente no esperansa katak fasilidade foun ida ne’e bele fó impaktu positivu ba dezenvolvimentu ekonómiku no sosiál iha área refere.
Autoridade Munisipál Liquiça kontinua kompromete atu servisu hamutuk ho Governu Sentrál no parseiru relevante sira, hodi promove dezenvolvimentu sustentável iha setor peskas no hasa’e moris diak komunidade peskador sira iha Munisípiu Liquiça.