Liquiça, 16 Dezembru 2025
SEKRETÁRIU MUNISIPÁL ASSUNTU ADMINISTRASAUN NO FINANSAS ABERTURA FORMASAUN TÉKNIKU LIDERANSA BA XEFE DEPARTAMENTU SIRA IHA MUNICÍPIU LIQUIÇA
Sekretáriu Munisipál Assuntu Administrasaun no Finansas, Sr. Fernando da Conceição, Lic. SP., M.SP, ofisialmente halo abertura ba Formasaun Tékniku Lideransa ba Xefe Departamentu sira husi Diresaun Servisu Munisipál no Servisu Lokál sira iha Postu Administrativu, iha Autoridade Munisipál Liquiça.
Formasaun ne’e hala’o tuir Dekretu-Lei N.º 49/2023, 23 Agostu, kona-ba Organika Ministériu Administrasaun Estatal (MAE), liu husi Diresaun Jeral Simplifikasaun no Modernizasaun Administrasaun Lokál, no implementa husi Diresaun Nasional Formasaun no Kooperasaun (DNFC), tuir papel servisu DNFC nian ne’ebé previstu iha Artigu 34.
Iha Artigu refere ne’e, DNFC mak responsavel hodi hala’o aktu administrativu materiál relasiona ho formasaun rekursu umanu administrasaun lokál no mós estabelesimentu parseria ba kooperasaun iha área governasaun desentralizadu, hamutuk ho organizasaun nasionál, estranjeiru ka internasionál sira.
Bazeia ba dispozisaun legal ida ne’e, DNFC iha responsabilidade hodi organiza no koordena formasaun rekursu umanu iha munisípiu sira, no kolabora ho instituisaun relevante hanesan Institutu Nasional Administrasaun Públika (INAP) nu’udar instituisaun fornese governu nian ba funsionáriu públiku sira.
Relasiona ho papel INAP, Dekretu-Lei N.º 38/2012, 1 Agostu, iha Artigu 9.º, hateten katak INAP iha kompeténsia atu koordena formasaun no dezenvolvimentu iha área administrasaun públika, hamutuk ho parseiru dezenvolvimentu sira, atu evita duplikasaun materiál no partisipante sira iha prosesu formasaun.
Hodi asegura planeamentu no implementasaun formasaun ne’ebé efisiente iha tinan 2026, Sekretáriu Munisipál haktuir pedidu ba Presidente Autoridade Munisipál Liquiça atu submete kalendáriu atividade formasaun, tantu formasaun iha rai liu nian no mós formasaun ne’ebé hala’o iha munisípiu, ba DNFC. Kalendáriu ida ne’e importante atu DNFC bele kompilha dadus formasaun sira no enkaixa ho planu atividade ministériu nian.
Iha momentu hanesan, Sekretáriu Munisipál husu mós ba Servisu Munisipál Rekursu Humanu atu kooperasa hamutuk ho Asesor PARTISIPA sira hodi prepara planu formasaun refere nian, atu garante kapasidade, profisionalizmu no kualidade servisu funsionáriu públiku sira iha Munisípiu Liquiça.
Formasaun Tékniku Lideransa ne’e hala’o iha Salaun Enkontru Munisipál Liquiça durante loron haat (4), hahú husi loron 16 to’o 19 Dezembru 2025, ho objetivu hodi hametin kapasidade lideransa, jestaun ekipa, tomada desizaun, no étika servisu ba Xefe Departamentu sira, atu bele hasa’e efisiénsia, responsabilidade no dezenvolvimentu servisu públiku iha nivel munisípiu.
Iha abertura formasaun, Sekretáriu Munisipál subliña katak lideransa ne’ebé diak sei bele fó impaktu positivu ba implementasaun politika públika no prestasaun servisu ba komunidade, no hein katak partisipante sira bele aproveita formasaun ida ne’e ho diak, hodi aplika koñesimentu ne’ebé hetan iha fatin servisu kada loron.
Autoridade Munisipál Liquiça kontinua kompriende importánsia investimentu iha dezenvolvimentu rekursu umanu nu’udar xave prinsipal ba hasa’e kualidade governasaun lokál no servisu ba povu.