Liquiçá, 10 Marsu 2026 –
Reprezentante husi Presidente Autoridade Munisipál Liquiçá, Xefi Gabineti PAM Sr. Marcelino de Jesus Pereira, partisipa iha atividade reflorestasaun ho kuda au oan iha Suku Leorema, Aldeia Urema, Postu Administrativu Bazartete, Munisípiu Liquiçá.
Atividade kuda au oan ne’e fasilita husi Autoridade Proteksaun Civil (APC) Munisípiu Liquiçá ho kolaborasaun ho Institutu Bambu. Inisiativa ida ne’e halo ho objetivu atu proteje meiu ambiente, halo konservasaun ba floresta no prevene dezastre naturáis hanesan rai halai iha komunidade sira ne’ebé hela besik iha área risku iha Suku Leorema, liu-liu iha Aldeia Urema.
Iha biban ne’e, Xefi Gabineti ne’ebé reprezenta Presidente Autoridade Munisipál hateten katak atividade reflorestasaun ne’e importante tebes atu hatur fila fali natureza hanesan uluk. Nia esplika katak mudansa klimátika halo ita nia rai hasoru konsekuénsia oioin, inklui rai halai iha fatin barak, tanba ne’e presiza halo esforsu hamutuk atu kuda au no restaura ambiente.
“Loron ohin ita hamutuk kuda au oan iha ita nia rai ho esperansa katak au oan sira ne’ebé ita kuda la’ós formalidade deit, maibé loron ida sei fó benefísiu barak ba ita hotu. Au sira iha funsaun importante atu prezerva natureza, kuida rai, no fó mos valor ekonomia ba komunidade,” hateten Sr. Marcelino.
Nia mos enfatiza katak governu no autoridade lokal mesak la bele halo servisu hotu-hotu, tanba ne’e presiza kooperasaun husi instituisaun sira no komunidade. Tanba ne’e, nia agradese no apresia ba Autoridade Proteksaun Civil ne’ebé koordena atividade ida ne’e hamutuk ho Institutu Bambu ne’ebé fornese au oan atu kuda iha área refere.
Xefi Gabinete akresenta tan katak, Au sira ne’ebé ita kuda nain mak ita rasik, no ita mak tenke kuida didiak atu iha futuru ita bele goza nia rezultadu,
Atividade reflorestasaun ida ne’e hetan partisipasaun husi reprezentante Autoridade Munisipál Liquiçá, Xefi Gabineti PAM, Komandante Autoridade Proteksaun Civil, Diretor Ezekutivu Institutu Bambu, reprezentante Direção Dezastre Naturál, reprezentante APA Bazartete, Xefe Suku Leorema, Adjuntu Diretor Eskola Tékniku Vokasionál Leorema, estudante sira no komunidade lokal.
Ho realizasaun atividade ida ne’e, espera katak komunidade bele aumenta tan konsiénsia kona-ba importánsia proteje meiu ambiente, konserva floresta no prevene dezastre naturáis hodi garante sustentabilidade ba gerasaun ohin no futuru.