LIQUIÇÁ, Quarta-Feira, 04 Marsu 2026
Presidente Autoridade Munisipál Liquiçá, Sua Exelénsia Paulino Ribeiro, M.PA, partisipa iha Serimónia Abertura Ofisiál Formasaun no Asisténsia Téknika ba Kargu Dirijente Autoridade Munisipál no Postu Administrativu sira, ne’ebé hala’o iha Salaun Enkontru Autoridade Munisipál Liquiçá durante loron tolu, hahú husi loron 04 to’o 06 fulan Marsu. Atividade formasaun ida-ne’e fasilita husi INAP.
Serimónia abertura ne’e ofisialmente loke husi Ministério da Administração Estatal, liuhusi Diretór Jerál Desentralizasaun no Governu Lokál, António Augusto Guterres, hanesan parte husi implementasaun planu formasaun no asisténsia téknika ba tinan 2026.
Formasaun ne’e lori tema: “Kontinua Haforsa Estrutura Munisipál liu husi Kapasitasaun”, ho objetivu atu reforça kapasidade lideransa, jestaun administrativa no koñesimentu tékniku dirijente sira, hodi asegura katak estrutura munisipál bele funsiona ho efisiénsia, transparénsia no responsabilidade.
Iha nia intervensaun, Diretór Jerál Desentralizasaun no Governu Lokál esplika katak inisiativa ida-ne’e reflete Governu Sentrál nia kompromisu atu kontinua fó apoiu no asisténsia ba autoridade munisípiu sira, bazeia ba Dekretu-Lei N.º 34/2025, 15 Outubru, ne’ebé halo Sexta Alterasaun ba Dekretu-Lei N.º 3/2016, 16 Marsu, kona-ba Estatutu Administrasaun Munisipál, Autoridade Munisipál no Grupu Tékniku Interministerial ba Desentralizasaun Administrativa.
Nune’e mós, formasaun ne’e tuir orientasaun husi Rezolusaun Governu N.º 6/2025, 10 Fevereiru, kona-ba ezekusaun Estratéjia Desentralizasaun Administrativa no Instalasaun Órgaun Reprezentativu Poder Lokál 2025–2028. Nia enfatiza katak prioridade ba tinan ida-ne’e maka investe iha formasaun no kapasitasaun funsionáriu munisipál sira to’o tinan 2026, hanesan preparasaun atu kumpre kondisaun mínimu ne’ebé ezije iha prosesu avaliasaun.
Tamba ne’e, nia husu ba Autoridade Munisipál Liquiçá atu kontinua esforsu no servisu hamutuk, tanba iha fulan Juñu sei hala’o fali avaliasaun ba Munisípiu Liquiçá hodi haree prontidaun ba eleisaun Poder Lokál.
Formasaun ba Kargu Xefia sira hala’o durante loron tolu, hahú husi loron 04 to’o 06 fulan Marsu 2026, no formasaun ba tékniku administrativu sira mós hala’o iha períodu hanesan. Matéria sira ne’ebé aborda inklui jestaun administrasaun públika, planeamentu estratéjiku, jestaun finansas munisipál, prosedimentu administrativu no mekanizmu koordinasaun interinstitusionál.
Serimónia abertura ne’e hetan mós partisipasaun husi Diretór Nasionál sira, Administradór Postu Administrativu Ataúro, Sekretáriu Munisipál husi Ermera, Baucau, Bobonaro no Covalima, inklui mós diretór servisu munisipál no xefe departamentu sira.
Presensa representante husi munisípiu sira seluk hatudu kooperasaun no komitmentu hamutuk atu susesu implementasaun desentralizasaun administrativa iha rai-laran.
Iha biban ida-ne’e, Prezidente Autoridade Munisipál Liquiçá, Sua Exelénsia Paulino Ribeiro, hanesan uma-na’in, agradese tebes ba Ministériu Administrasaun Estatal tamba hili Munisípiu Liquiçá nu’udar fatin dahuluk ba realizasaun atividade formasaun ida-ne’e. Nia hatete katak formasaun ne’e importante tebes atu aumenta koñesimentu no kompeténsia diretór no xefe departamentu sira, liu-liu iha área tékniku no jestaun administrativa.
Nia mos reafirma katak ho apoiu husi MAE no INAP, Munisípiu Liquiçá sei kontinua prepara an atu hakat ba implementasaun Poder Lokál ho governasaun ida-ne’ebé di’ak, transparente no responsavel. “Ami fiar katak ho formasaun ida-ne’e, ami bele jere administrasaun munisipál ho di’ak liu tan no fó servisu ne’ebé efikás ba povu,” hatete PAM Liquiçá.
Ho realizasaun atividade ida-ne’e, Autoridade Munisipál Liquiçá reafirma nia komitmentu atu eleva dirijente sira nia koñesimentu profisionál no kapasidade lideransa, hodi garante prestasaun servisu públiku ne’ebé di’ak liu tan ba komunidade no kontribui ba dezenvolvimentu sustentável Munisípiu Liquiçá.
Media Portal Munisipal Liquica