---

𝐇𝐚𝐬𝐚’𝐞 𝐁𝐚𝐧𝐝𝐞𝐢𝐫𝐚 𝐑𝐃𝐓𝐋 𝐒𝐞𝐦𝐚𝐧𝐚 𝐃𝐚𝐡𝐮𝐥𝐮𝐤 𝐅𝐮𝐥𝐚𝐧 𝐉𝐮ñ𝐮 2026; 𝐏𝐀𝐌 𝐋𝐢𝐪𝐮𝐢çá 𝐄𝐧𝐟𝐚𝐭𝐢𝐳𝐚 𝐃𝐢𝐬𝐢𝐩𝐥𝐢𝐧𝐚 𝐒𝐞𝐫𝐯𝐢𝐬𝐮, 𝐋𝐢𝐦𝐩𝐞𝐳𝐚 𝐀𝐦𝐛𝐢𝐞𝐧𝐭𝐚𝐥 𝐧𝐨 𝐑𝐞𝐬𝐩𝐨𝐧𝐬𝐚𝐛𝐢𝐥𝐢𝐝𝐚𝐝𝐞 𝐈𝐧𝐬𝐭𝐢𝐭𝐮𝐬𝐢𝐨𝐧á𝐥

Liquiçá, 01 Juñu 2026 – Prezidente Autoridade Munisipál Liquiçá, Sua Exelénsia Paulino Ribeiro, M.PA, prezide Serimónia Hasa’e Bandeira Repúblika Demokrátika Timor-Leste (RDTL) ba semana dahuluk fulan Juñu 2026, ne’ebé realiza iha Edefísiu Administrasaun Autoridade Munisipál Liquiçá ho atmosfera solene, ordenadu no nakonu ho espiritu patriotizmu.

Serimónia ne’e hala’o hanesan atividade regular semanal ne’ebé ninia objetivu principal mak atu hametin sentimentu nasionalizmu, disiplina servisu, responsabilidade profissional no komitmentu funsionáriu públiku sira hodi presta servisu di’ak liu ba komunidade.

Iha nia intervensaun, Prezidente Autoridade Munisipál Liquiçá hatete katak diretór sira no xefe departamentu sira tenke aumenta tan supervizaun no akompanhamentu ba funsionáriu sira durante oras servisu atu garante efisiénsia, produtividade no qualidade servisu governasaun nian.

Nia salienta katak lideransa iha kada nível iha responsabilidade importante atu orienta no garante implementasaun servisu tuir regra no prosedimentu administrativu ne’ebé vigora.

“Xefe Departamentu mak tenke diriji no orienta Xefe Seksaun sira, no Xefe Seksaun sira mos tenke akompaña no diriji funsionáriu sira atu servisu ho di’ak. Ita hotu tenke fó atensaun ba disiplina servisu tanba ita lakohi hetan kritika husi komunidade no públiku kona-ba servisu governu nian,” hateten PAM.

Iha oportunidade ne’e, PAM mos fó orientasaun ba Diretór Jestaun Merkadu no Diretór Servisu Munisipál Água no Saneamentu (SMASA) relasiona ho problema animal sira ne’ebé dala barak sei movimentu iha estrada publiku sira no mos estraga ambiente iha area publiku sira.

Nia lembra katak despaxu kona-ba kontrolu animal sira seidauk iha alterasaun no sei vigora nafatin. Tanba ne’e, autoridade kompetente sira tenke kontinua implementa operasaun regular atu prevene risku ba utilizadór estrada sira, protege saúde públika no mantén ambiente munisipál ne’ebé seguru, limpu no organizadu.

Prezidente Autoridade Munisipál mos subliña katak implementasaun atividade sira ne’e labele depende deit ba orientasaun direta husi lideransa, maibé tenke realiza tuir responsabilidade institusionál ne’ebé atribui ona ba entidade relevante sira.

Iha área limpeza no embelezamentu munisipiu, PAM hato’o nia apresiasaun boot ba Ekipa Brigada Limpu Munisipál ne’ebé durante ne’e servisu ativamente hodi mantén limpeza no beleza ambiente husi área Tibar to’o Cidade Liquiçá.

Segundo nia, rezultadu servisu brigada limpeza nian kontribui signifikativamente ba kriasaun ambiente ne’ebé moos, saudável no agradavel ba komunidade.

Maski nune’e, nia husu ba komunidade tomak no funsionáriu públiku sira atu aumenta tan konsiénsia ambiental hodi la soe lixu arbiru no sempre utiliza fatin rekolla lixu ne’ebé prepara ona.

“Limpeza la’ós deit responsabilidade Brigada Limpu, maibé responsabilidade hamutuk husi ita hotu hanesan sidadaun Timor-Leste. Favor ida soe lixu iha nia fatin atu bele hametin ambiente ne’ebé moos no saudável ba ema hotu,” dehan PAM.

Nia mos encoraja funsionáriu sira hotu, inklui diretór, xefe departamentu no lideransa sira seluk, atu kontinua partisipa ativamente iha atividade limpeza semanal ne’ebé realiza kada loron sexta-feira hanesan parte husi kultura servisu no responsabilidade kolektiva ba manutensaun ambiente.

Iha remata nia intervensaun, Prezidente Autoridade Munisipál Liquiçá reafirma komitmentu Autoridade Munisipál Liquiçá atu kontinua hadi’a prestasaun servisu públiku liu husi prinsípiu unidade, integridade, transparénsia no dedikasaun atu responde efetivamente ba nesesidade no aspirasaun komunidade Munisípiu Liquiçá.

Serimónia Hasa’e Bandeira ne’e hetan partisipasaun husi Sekretáriu Munisipál nain tolu, Administradór Postu Administrativu nain haat husi Bazartete, Liquiçá, Maubara no Loes, Diretór Servisu Munisipál sira, Diretór Delegasaun sira, Xefe Departamentu sira, Korpu Bombeiros Munisípiu Liquiçá, elementu seguransa, funsionáriu públiku sira no estudante estajiáriu sira.

Liu husi realizasaun serimónia ida ne’e, Autoridade Munisipál Liquiçá kontinua demonstra nia komitmentu atu promove disiplina institusionál, limpeza ambiental, governasaun di’ak no prestasaun servisu públiku ne’ebé efisiente no responsivu atu fó benefísiu ba komunidade tomak.

---

Redasaun: Equipa Media Portal Munisipál Liquiçá.
Data Publikasaun: 01 Juñu 2026.