Liquiçá, 03 Dezembru 2025
Munisípiu Liquiçá hala’o ho di’ak serimónia ofisiál hodi selebra Loron Mundiál Ema ho Defisiénsia, evento importante ida ne’ebé hala’o anualmente iha mundu tomak atu promove direitu, dignidade no partisipasaun husi Ema ho Defisiénsia iha sociedade.
Iha loron 3, fulan dezembru, tinan 2025, Prezidente Autoridade Munisipál Liquiçá, Sua Exelênsia PAULINO RIBEIRO, M.PA, partisipa direta iha serimónia ida-ne’e, hanesan sinal apoiu PAM ba politika inkluzivu iha nivel munisipál.
Serimónia ida-ne’e mos partisipa husi Sekretáriu Estadu Peskas, Sua Exelênsia Dr. DOMINGOS DA CONCEIÇÃO DOS SANTOS “Mau-Caro”, Organizasaun Sosiedade Sivil, Asosiasaun Ema ho Defisiénsia (EHD), funsionáriu institucionaes no komunidade sira husi suku-sira iha Liquiçá.
TEMA NASEONÁL NO INTERNASIONÁL
Iha selebrasaun tinan-ne’e, Timor-Leste simu tema nasional:
“Implementasaun PAN-EHD 2021–2030 no CRPD iha nivel hotu-hotu mak xavi ba Timor-Leste hodi avansa progresu sosiál no haburas inkluzaun defisiénsia.”
Tema global husi Nasaun Unidas (UN) mak fó énfaze ba:
“Haburas sosiedade ne’ebé inkluzivu ba defisiénsia hodi avansa progresu sosiál.”
Tema sira-ne’e hatudu prioridade internasionál no nasional atu aumenta participasaun, proteje direitu no sosiál ba Ema ho Defisiénsia.
MENSAJEM PAM
Iha nia diskursu, Presidente PAM hatete:
- PAM hato’o parabens ba loron mundial ba maluk sira ho defisénsia iha mundu tomak, liu-liu iha Timor-leste espesialmente ba Munisípiu Liquiçá
- Loron ida-ne’e importante tebes atu rekunesé katak Ema ho Defisiénsia parte integrál husi sociedade, la’ós hanesan objetu karidade, maibé hanesan sidadaun ho direitu ne’ebé hanesan
- Munisípiu Liquiçá sei kontinua fó prioridade ba servisu inkluzivu, asesu ba infraestruturas, edukasaun no oportunidade empleu ba Ema ho Defisiénsia.
- Nia hato’o gratidaun ba organizasaun sira ne’ebé halo esforsu atu fó apoio ba komunidade EHD iha nível lokal.
KONTÉUDU SERIMÓNIA
Atividade selebrasaun hahu ho
Misa Agradesementu iha Parókia SAJOBRIL,
atu agradece ba Deus no lori hanoin kona ba valor humanidade, solidariedade no inkluzaun.
Depois hosi misa, programa kontinua iha:
Salaun Tokodede Center,
ho atividade sira hanesan:
- Apresentasaun husi Asosiasaun EHD kona ba situasaun Ema ho Defisiénsia iha Liquiçá;
- Diskusaun ba implementasaun PAN-EHD iha nivel munisipál;
- Entrega simbolika ba benefisáriu EHD;
- Apresentasaun cultura husi grupu inkluzivu;
- Partilha inspirasaun husi Ema ho Defisiénsia ne’ebé maka halibur esperiensia no motivasaun ba publiku.
Serimónia ida-ne’e fó oportunidade atu hadia kooperasaun entre Governu, ONG, instituisaun igrejá no komunidade atu sustenta habitasaun inkluzivu no servisu sosial ne’ebé mak sensível ba defisiénsia.