Hatutan.com, (18 Dezembru 2021), Liquiça—Prezidente Repúblika (PR), Francisco Guterres Lú Olo, lansa kampaña nasionál kuda ai-oan 200  iha área tasi-ibun Pilila, suku Lauhata, postu administrativu Bazartete, munisípiu Liquiça.

Programa integra no kuda ai-oan ne’e nu’udár programa kontinuasaun hosi atividade PR nian ho lema ‘sidadaun ida ai oan ida’.

“Programa ida ne’e nu’udár kompromisu politika ba ha’u-nia mandatu nu’udár PR atu kuda ai-oan tokon ida,” Francisco Guteres “Lu Olo”, hateten.

Xefe Estadu hamutuk ho membru Governu, Parlamentu Nasionál, autoridade munisipál lansa kampaña kuda ai-oan nasionál ne’e  iha Timor-Leste bazeia ba rezolusaun governu nú 11/2017, 27 Fevereiru hodi selebra loron nasionál ai kameli no floresta ne’ebé monu iha 13 Janeiru.

Iha vizita ba munisípiu sira, Prezidente Repúblika fahe ona ai-oan hamutuk 928.295 ba komunidade, hodi bele kuda hanesan iha munisipiu Viqueque ai oan 1.000, Covalima 1.400, Lautém ai oan 2.000, Ermera ai oan 2.000, Baucau 1.200, Bobonaro 1.200, Ainaro 800, Liquiça 600 no Manufahi 1.200.

Iha fatin hanesan Vise Ministru Agrikultura no Peska, Abílio Xavier de Araújo, hateten programa reflorestasaun ne’e rasik nu’udár meius ida atu kuda hikas ai oan sira ba rai mamuk ne’ebé identifika iha munisipiu ida-idak, nune’e natureza iha Timor matak no buras hikas hanesan mós iha rai seluk.

“Ita nia programa ne’e ho inisiativa atu kuda ai sira hodi satan bee no prevene erozaun,” Abilio Xavier de Araújo, hateten.

Parte MAP haree katak, ohin loron ema menus konsiénsia atu kuidadu no proteze natureza liu hosi tesi ai arbiru.

Ema barak mak tesi ai ba faan, sunu no uza ba nesesidade seluk maibé la iha responsabilidade atu kuda hikas ai sira tuir kondisaun no nesesidade ne’ebé iha.

Nune’e mós  Xefe Departementu Reflorestasaun Jerál Kafe no Planta Industriais, Ministeriu Agrikultura no Peska  (MAP), Fernandino Viera da Costa, hateten atividade kuda ai oan ne’e iha mós ligasaun ho politika oitavu Governu konstituisionál nian, tanba ne’e diresaun ne’e prodús ai oan tokon ida liu hosi sentru Viveiru permanente no mós Viveiru komunitáriu ne’ebé estabelese iha postu 40 iha territóriu nasionál.

Sentru Viveiru permanente hamutuk haat mak hanesan Lautém, Viqueque, Manufahi no Maubara ho espésie ai oan sira ne’ebé prodús iha tolu mak hanesan ai produsaun, ai ba satan bee inklui ai fuan sira ne’ebé sei kuda iha kintál konunidade.

Administradór Postu Administrativu Bazartete, João Nascimento Braz orgullu tanba Prezidente Repúblika  bele mai hamutuk ho komunidade suku Lauhata kuda ai oan simbolikamente iha área Pilila atu hatudu ba komunidade no sosiedade tomak katak, importante tebes ‘sidadaun ida ai oan ida’ hodi proteze no konserva nafatin ambiente ba futuru.

Ai oan sira ne’ebé sei kuda iha área Pilila, hamutuk 200 kompostu husi Ai Kameli, Ai Kakeu, Rambutan no Nuu.