Dili,24–29 Novembru 2025
Presidente Autoridade Munisípiu Liquiçá, Sua Exelênsia Paulino Ribeiro, M.PA, hamutuk ho funsionáriu Administrasaun Munisipál Liquiçá, partisipa iha Abertura Ofisiál Expozisaun Feira Nasionál, ne’ebé hala’o iha ambitú Komemorasaun Proklamasaun Unilateral Independénsia Repúblika Demokratika de Timor-Leste ba dala-50.
Serimónia abertura ida-ne’e dirije diretamente hosi Presidente Repúblika, Sua Exelênsia Dr. José Ramos-Horta, ho akompanhamentu hosi membru Governu, membru Parlamentu Nasionál, Autoridade Munisípal sira, no mos komunidade, estudante, jovem no partisipante sira hotu, ne’ebé enche ambiente Tasi-Tolu nian ho motivasaun no espírito patriotismu hasoru loron importante ida ne’e.
Expozisaun Feira Nasionál mak fó oportunidade ba Munisípiu sira tomak atu hatudu identidade kulturál, arte tradisionál, produtu agrikultura, ekonomia kreativa, inovasaun lokal, no mos resultadu dezenvolvimentu husi munisípiu ida-idak durante tinan 50 independénsia nian.
Objektivu principal husi expozisaun ida-ne’e mak:
- Fó valorizasaun no dignidade ba produtu lokal ida-idak;
- Promove kooperasaun inter-munispál no fortalese relasaun dezenvolvimentu;
- Hatudu progresu munisípiu sira iha area agrikultura, turizmu, indústrialização no inovasaun sosial;
- Hamosu ambiente aprende hamutuk entre sektor governu, privadu no komunidade.
Iha serimónia ida-ne’e, Presidente Repúblika José Ramos-Horta, hamutuk ho Presidente Komisaun Organizadora Nasionál, ne’ebé mak Ministru Administrasaun Estatál, Sua Exelênsia Tomás do Rosário Cabral, halo deklarasaun abertura ofisiál, no sublinha importánsia loron Proklamasaun Unilateral Independénsia hanesan momente istóriku ne’ebé fó direitu no dignidade ba povu Timor-Leste hodi tama bainhira mundu internasionál rekonhese soberania nasaun ida ne’e.
Expozisaun Feira Nasionál hahu husi loron 24 too 29 Novembru 2025, hodi fó espasu ba vizitante sira atu haree, aprende no apoiu produtu lokal. Munisípiu Liquiçá mos partisipa ho stand espesiál, ne’ebé reprezenta identidade, kultura, gastronomia no produtu komunidade sira husi Liquiçá, hodi fó kontribuisaun iha promosaun produtu lokal ba nivel nasional.
Atividade ida-ne’e importante tebes atu:
- Hadi’a imajen publiku kona ba kapasidade munisípiu;
- Estimula produtor lokal sira atu kontinua hadia produtu;
- Hatuir planu dezenvolvimentu munisipál no nasional ba tempu oin.
Munisípiu Liquiçá agradece ba Komisaun Organizadora Nasionál no Governu Timor-Leste pela oportunidade atu kontribui iha evento nasional ne’e.
#Media_PortalLiquiça