𝐇𝐚𝐬𝐚’𝐞 𝐁𝐚𝐧𝐝𝐞𝐢𝐫𝐚 𝐑𝐃𝐓𝐋 𝐒𝐞𝐦𝐚𝐧𝐚 𝐃𝐚𝐡𝐮𝐥𝐮𝐤 𝐅𝐮𝐥𝐚𝐧 𝐉𝐮ñ𝐮 2026; 𝐏𝐀𝐌 𝐋𝐢𝐪𝐮𝐢çá 𝐄𝐧𝐟𝐚𝐭𝐢𝐳𝐚 𝐃𝐢𝐬𝐢𝐩𝐥𝐢𝐧𝐚 𝐒𝐞𝐫𝐯𝐢𝐬𝐮, 𝐋𝐢𝐦𝐩𝐞𝐳𝐚 𝐀𝐦𝐛𝐢𝐞𝐧𝐭𝐚𝐥 𝐧𝐨 𝐑𝐞𝐬𝐩𝐨𝐧𝐬𝐚𝐛𝐢𝐥𝐢𝐝𝐚𝐝𝐞 𝐈𝐧𝐬𝐭𝐢𝐭𝐮𝐬𝐢𝐨𝐧á𝐥

𝐇𝐚𝐬𝐚’𝐞 𝐁𝐚𝐧𝐝𝐞𝐢𝐫𝐚 𝐑𝐃𝐓𝐋 𝐒𝐞𝐦𝐚𝐧𝐚 𝐃𝐚𝐡𝐮𝐥𝐮𝐤 𝐅𝐮𝐥𝐚𝐧 𝐉𝐮ñ𝐮 2026; 𝐏𝐀𝐌 𝐋𝐢𝐪𝐮𝐢çá 𝐄𝐧𝐟𝐚𝐭𝐢𝐳𝐚 𝐃𝐢𝐬𝐢𝐩𝐥𝐢𝐧𝐚 𝐒𝐞𝐫𝐯𝐢𝐬𝐮, 𝐋𝐢𝐦𝐩𝐞𝐳𝐚 𝐀𝐦𝐛𝐢𝐞𝐧𝐭𝐚𝐥 𝐧𝐨 𝐑𝐞𝐬𝐩𝐨𝐧𝐬𝐚𝐛𝐢𝐥𝐢𝐝𝐚𝐝𝐞 𝐈𝐧𝐬𝐭𝐢𝐭𝐮𝐬𝐢𝐨𝐧á𝐥

Liquiçá, 01 Juñu 2026 – Prezidente Autoridade Munisipál Liquiçá, Sua Exelénsia Paulino Ribeiro, M.PA, prezide Serimónia Hasa’e Bandeira Repúblika Demokrátika Timor-Leste (RDTL) ba semana dahuluk fulan Juñu 2026, ne’ebé realiza iha Edefísiu Administrasaun Autoridade Munisipál Liquiçá ho atmosfera solene, ordenadu no nakonu ho espiritu patriotizmu.

Serimónia ne’e hala’o hanesan atividade regular semanal ne’ebé ninia objetivu principal mak atu hametin sentimentu nasionalizmu, disiplina servisu, responsabilidade profissional no komitmentu funsionáriu públiku sira hodi presta servisu di’ak liu ba komunidade.

Iha nia intervensaun, Prezidente Autoridade Munisipál Liquiçá hatete katak diretór sira no xefe departamentu sira tenke aumenta tan supervizaun no akompanhamentu ba funsionáriu sira durante oras servisu atu garante efisiénsia, produtividade no qualidade servisu governasaun nian.

Nia salienta katak lideransa iha kada nível iha responsabilidade importante atu orienta no garante implementasaun servisu tuir regra no prosedimentu administrativu ne’ebé vigora.

“Xefe Departamentu mak tenke diriji no orienta Xefe Seksaun sira, no Xefe Seksaun sira mos tenke akompaña no diriji funsionáriu sira atu servisu ho di’ak. Ita hotu tenke fó atensaun ba disiplina servisu tanba ita lakohi hetan kritika husi komunidade no públiku kona-ba servisu governu nian,” hateten PAM.

Iha oportunidade ne’e, PAM mos fó orientasaun ba Diretór Jestaun Merkadu no Diretór Servisu Munisipál Água no Saneamentu (SMASA) relasiona ho problema animal sira ne’ebé dala barak sei movimentu iha estrada publiku sira no mos estraga ambiente iha area publiku sira.

Nia lembra katak despaxu kona-ba kontrolu animal sira seidauk iha alterasaun no sei vigora nafatin. Tanba ne’e, autoridade kompetente sira tenke kontinua implementa operasaun regular atu prevene risku ba utilizadór estrada sira, protege saúde públika no mantén ambiente munisipál ne’ebé seguru, limpu no organizadu.

Prezidente Autoridade Munisipál mos subliña katak implementasaun atividade sira ne’e labele depende deit ba orientasaun direta husi lideransa, maibé tenke realiza tuir responsabilidade institusionál ne’ebé atribui ona ba entidade relevante sira.

Iha área limpeza no embelezamentu munisipiu, PAM hato’o nia apresiasaun boot ba Ekipa Brigada Limpu Munisipál ne’ebé durante ne’e servisu ativamente hodi mantén limpeza no beleza ambiente husi área Tibar to’o Cidade Liquiçá.

Segundo nia, rezultadu servisu brigada limpeza nian kontribui signifikativamente ba kriasaun ambiente ne’ebé moos, saudável no agradavel ba komunidade.

Maski nune’e, nia husu ba komunidade tomak no funsionáriu públiku sira atu aumenta tan konsiénsia ambiental hodi la soe lixu arbiru no sempre utiliza fatin rekolla lixu ne’ebé prepara ona.

“Limpeza la’ós deit responsabilidade Brigada Limpu, maibé responsabilidade hamutuk husi ita hotu hanesan sidadaun Timor-Leste. Favor ida soe lixu iha nia fatin atu bele hametin ambiente ne’ebé moos no saudável ba ema hotu,” dehan PAM.

Nia mos encoraja funsionáriu sira hotu, inklui diretór, xefe departamentu no lideransa sira seluk, atu kontinua partisipa ativamente iha atividade limpeza semanal ne’ebé realiza kada loron sexta-feira hanesan parte husi kultura servisu no responsabilidade kolektiva ba manutensaun ambiente.

Iha remata nia intervensaun, Prezidente Autoridade Munisipál Liquiçá reafirma komitmentu Autoridade Munisipál Liquiçá atu kontinua hadi’a prestasaun servisu públiku liu husi prinsípiu unidade, integridade, transparénsia no dedikasaun atu responde efetivamente ba nesesidade no aspirasaun komunidade Munisípiu Liquiçá.

Serimónia Hasa’e Bandeira ne’e hetan partisipasaun husi Sekretáriu Munisipál nain tolu, Administradór Postu Administrativu nain haat husi Bazartete, Liquiçá, Maubara no Loes, Diretór Servisu Munisipál sira, Diretór Delegasaun sira, Xefe Departamentu sira, Korpu Bombeiros Munisípiu Liquiçá, elementu seguransa, funsionáriu públiku sira no estudante estajiáriu sira.

Liu husi realizasaun serimónia ida ne’e, Autoridade Munisipál Liquiçá kontinua demonstra nia komitmentu atu promove disiplina institusionál, limpeza ambiental, governasaun di’ak no prestasaun servisu públiku ne’ebé efisiente no responsivu atu fó benefísiu ba komunidade tomak.

Redasaun: Equipa Media Portal Munisipál Liquiçá.
Data Publikasaun: 01 Juñu 2026.

𝐒𝐞𝐫𝐢𝐦ó𝐧𝐢𝐚 𝐇𝐚𝐬𝐚’𝐞 𝐁𝐚𝐧𝐝𝐞𝐢𝐫𝐚 𝐍𝐚𝐬𝐢𝐨𝐧𝐚𝐥 𝐇𝐨𝐝𝐢 𝐊𝐨𝐦𝐞𝐦𝐨𝐫𝐚 𝐋𝐨𝐫𝐨𝐧 𝐑𝐞𝐬𝐭𝐚𝐮𝐫𝐚𝐬𝐚𝐮𝐧 𝐈𝐧𝐝𝐞𝐩𝐞𝐧𝐝é𝐧𝐬𝐢𝐚 𝐛𝐚 𝐃𝐚𝐥𝐚 24

Tibar, 20,𝐌𝐚𝐢𝐮, 2026 – Prezidenti Autoridade Munisipál Liquiçá, akompaña husi Administradór Postu Administrativu Bazartete, partisipa iha Serimónia Hasa’e Bandeira Nasional República Demokrátika Timor-Leste (RDTL) hodi komemora Loron Restaurasaun Independénsia ba dala 24, ne’ebé realiza iha Sede Suku Tibar, Postu Administrativu Bazartete, Munisípiu Liquiçá.

Serimónia ne’e hala’o ho ambiente solene no nakonu ho espiritu patriotizmu, ho partisipasaun husi autoridade sira no komunidade lokal ne’ebé hamutuk marka loron istóriku ida-ne’e ba povu no nasaun Timor-Leste. Atividade solene ne’e sai hanesan momentu importante atu haksolok no hanoin fila-fali luta naruk no sakrifísiu hosi herói no mártir sira ne’ebé fó-an ba independénsia rai doben ida-ne’e.

Iha serimónia ne’e, Prezidenti Autoridade Munisipál Liquiçá sai nu’udar inspetor Serimónia hodi prezide atividade ofisiál ida ne’e. Partisipa mós iha atividade ne’e maka Sekretáriu Estadu Assuntu Veteranos,Amu-lulik husi quaze Paroqia Bazartete, Komandante F-FDTL Komponente Naval Postu Destakadu Liquiçá, Komandante PNTL Munisípiu Liquiçá, Administradór Postu Administrativu Bazartete, Nai veteranu sira, Xefe Suku husi suku 9 iha Postu Administrativu Bazartete, funsionáriu públiku sira, servisu delegasaun sira neebé destaka Iha Munisípiu, Estudante sira, Korpu Bomberos Liquiçá, no komunidade hosi área oioin iha Munisípiu Liquiçá.

Iha Diskursu Nacional ne’ebé aprezenta husi Presidente Autoridade Liquiçá koalia kona ba :

• Timor-Leste Ohin Loron

• Progresu iha Dezenvolvimentu Umanu

• Edukasaun, Juventude no Kultura

• Progresu iha Saúde

• Pobreza, Inkluzaun no Empoderamentu

• Infraestrutura, ekonomia no soberania funsionál

• Setór Privadu no Dinamizasaun Ekonómika

• Rekursu Naturál, Enerjia no Baze Produtiva

• Reforma Interna sira, Justisa no Transformasaun Ekonómika

• Relasaun Internasionál sira

• Kooperasaun ho Territóriu Norte no NTT

• Kooperasaun Ekonómika no Projetu Estruturante sira

• Multilateralizmu no Orden Internasionál

• Integrasaun Tomak iha ASEAN

Vizita Iha Link PDF

https://drive.google.com/…/1u1bzEcByhjtzYKPhfbP…/view…

𝗜𝗵𝗮 𝗣𝗔𝗠 𝗻𝗶𝗮 𝗶𝗻𝘁𝗲𝗿𝘃𝗲𝗻𝘀𝗮𝘂𝗻 𝗻𝗲𝗯𝗲 𝗲𝗸𝗶𝗽𝗮 𝗽𝗼𝗿𝘁𝗮𝗹 𝗿𝗲𝗸𝗼𝗹𝗹𝗮, PAM hateten katak Loron Restaurasaun Independénsia mak momentu importante ida ba povu Timor-Leste atu lembra fila-fali luta naruk no sakrifísiu hosi herói no mártir sira ne’ebé fó-an ba ukun-an no soberania nasaun nian. PAM subliña katak independénsia ne’ebé povu Timor-Leste ohin loron goja la fasil, liu hosi luta naruk, sofrimento no determinasaun hosi povu tomak durante tempu okupasaun.

Loron ida-ne’e la’ós de’it selebrasaun ida, maibé mós oportunidade ida atu ita hotu hametin nafatin unidade, dame no espírito servisu hamutuk hodi dezenvolve nasaun no Munisípiu Liquiçá,” hateten PAM.

PAM mos akresenta katak unidade nasional no koperasaun entre governu, autoridade lokal no komunidade sai hanesan xave importante ida atu asegura dezenvolvimentu sustentável no estabilidade iha futuru, sidadaun hotu-hotu iha responsabilidade atu kontribui tuir ida-idak nia kapasidade hodi hadi’a moris komunidade no hametin instituisaun Estadu nian.

Prezidenti Autoridade Munisipál Liquiçá husu mós ba juventude sira atu kontinua valoriza istória luta independénsia no respeita nafatin veteranu no líder sira ne’ebé lori ona povu Timor-Leste to’o ba ukun-an. Nia encoraja juventude atu sai jerasaun ida ne’ebé ativa, kriativu no responsável liu-hosi edukasaun, disiplina, inovasaun no partisipasaun ativa iha atividade sosial no dezenvolvimentu komunidade.

PAM mos agradese ba entidade hotu-hotu, veteranu sira, autoridade lokal no komunidade ne’ebé partisipa iha serimónia refere inklui mos Postu Liquiçá, Maubara no Loes atu nafatin kontribui mantém dame no unidade iha Munisípiu Liquiçá. PAM mós husu ba komunidade atu kontinua hametin solidariedade no servisu hamutuk hodi hari’i munisípiu ida ne’ebé di’ak liu ba jerasaun agora no futuru.

Durante serimónia, partisipante sira hatudu respeitu boot ba bandeira nasional no ba valor patriotizmu liu hosi hananu hino nasional no momentu omenajen ba mártir no veteranu sira ne’ebé luta hodi hetan soberania no ukun-an ba povu Timor-Leste.

Komemorasaun Loron Restaurasaun Independénsia ba dala 24 ne’e sai hanesan oportunidade importante ida atu hasa’e sentimentu nasionalizmu no hametin nafatin valor independénsia, unidade no soberania nasaun nian ba jerasaun agora no jerasaun sira iha futuru.

𝗗𝗶𝘀𝗸𝘂𝗿𝘀𝘂 𝗵𝘂𝘀𝗶 𝗣𝗿𝗲𝘇𝗶𝗱𝗲𝗻𝘁𝗲 𝗥𝗲𝗽ú𝗯𝗹𝗶𝗸𝗮 𝗦𝗲ñó𝗿 𝗝. 𝗥𝗮𝗺𝗼𝘀-𝗛𝗼𝗿𝘁𝗮 𝗜𝗵𝗮 𝗼𝗸𝗮𝘇𝗶𝗮𝘂𝗻 𝗦𝗲𝗹𝗲𝗯𝗿𝗮𝘀𝗮𝘂𝗻 𝗔𝗻𝗶𝘃𝗲𝗿𝘀á𝗿𝗶𝘂 𝗯𝗮 𝗱𝗮𝗹𝗮-24 𝗵𝘂𝘀𝗶 𝗥𝗲𝘀𝘁𝗮𝘂𝗿𝗮𝘀𝗮𝘂𝗻 𝗜𝗻𝗱𝗲𝗽𝗲𝗻𝗱é𝗻𝘀𝗶𝗮 20 𝗺𝗮𝗶𝘂 2026

Vizita Iha Link PDF

https://drive.google.com/…/1u1bzEcByhjtzYKPhfbP…/view…

NOTÍSIA

Liquiçá, 28 Abril 2026 – Presidente Autoridade Munisipál Liquiçá, Sua Exelénsia Paulino Ribeiro, MPA, hamutuk ho Diretores relevante sira, realiza serimónia asinatura kontratu ofisiál ho kompanhia sira ne’ebé manan ona prosesu konkursu públiku liu husi sistema aprovizionamentu munisipál, iha salaun enkontru Autoridade Munisipál Liquiçá.

Kontratu hirak ne’e hahú fó efeitu ofisiál desde loron 05 fulan Janeiru tinan 2026, ho objetivu atu asegura implementasaun projetu sira iha munisípiu Liquiçá ho forma ne’ebé efisiente, transparente no responsável, hodi fó benefísiu direta ba komunidade.

Iha serimónia ne’e, mós aprezenta lista kompanhia sira ne’ebé manan konkursu públiku tuir pakote projetu sira ne’ebé iha. Kompanhia sira ne’e liu hotu prosesu avaliasaun tékniku no finanseira ne’ebé rigorozu, hodi asegura katak sira iha kapasidade atu implementa projetu sira ho padraun ne’ebé determina ona.

Kompanhia sira ne’ebé manan konkursu públiku inklui:

• Kompanhia konstrusaun sira ne’ebé responsabiliza ba obra infraestrutura hanesan estrada, drenajen no moru protesaun
• Kompanhia fornecedora ekipamentu no materiál konstrusaun
• Kompanhia prestadora servisu tékniku no konsultoria
• Kompanhia sira seluk ne’ebé envolve iha implementasaun projetu dezenvolvimentu lokal

(Nota: Lista detalhadu kompanhia no naran projetu bele publika tuir dokumentu ofisiál aprovizionamentu tuir pakote ida-idak)

Iha nia intervensaun, Presidente Autoridade Munisipál Liquiçá hateten katak seleksaun kompanhia sira liu husi konkursu públiku mak garante prosesu ne’ebé justu, transparente no kompetitivu.

“Autoridade munisipál sei kontinua asegura katak kompanhia sira ne’ebé manan kontratu tenke kumpri obrigasaun hotu, inklui kualidade servisu, tempu implementasaun no responsabilidade ba rezultadu final,”

Prosesu seleksaun ne’e bazeia ba Decreto-Lei N.º 1/2025, liuliu Artigu 35 kona-ba Konkursu Públiku, ne’ebé defini mekanizmu nakloke no kompetitivu atu fó oportunidade hanesan ba entidade hotu-hotu atu partisipa.

Tuir regulamentu, prosesu konkursu públiku inklui etapa importante sira hanesan publikasaun anúnsiu, submisaun proposta, análize dokumentu, avaliasaun tékniku no finanseira, no adjudikasaun final. Prosesu ida ne’e garante katak  kompanhia ne’ebé iha kapasidade no dokumentus kompletu mak bele manan kontratu.

Autoridade Munisipál Liquiçá reafirma nia kompromisu atu promove transparénsia, akuntabilidade no kompetisaun saudável iha aprovizionamentu públiku, hodi garante utilizasaun rekursu públiku ho diak no sustentável.

Ho asinatura kontratu ho kompanhia sira ne’ebé manan konkursu públiku, espera katak implementasaun projetu sira sei lao tuir planu no prazu ne’ebé estabelese, hodi kontribui ba hadi’a infraestrutura, servisu públiku no kondisaun moris komunidade iha Munisípiu Liquiçá.

#MediaPortalLiquiçá

NOTÍSIA

Liquiçá, 28 Abril 2026 – Autoridade Munisipál Liquiçá realiza Enkontru Extraordináriu Konsellu Konsultivu Munisipál (KKM) iha Salaun Enkontru Autoridade Munisipál, ne’ebé lokaliza iha Rua 11 de Outubro 2016, Suku Maumeta, Munisípiu Liquiçá.

Enkontru ne’e envolve membru sira husi Konsellu Konsultivu Munisipál ho objetivu atu reforsa partisipasaun ajente sosial no forsa ativa lokal sira iha prosesu governasaun, liu-liu iha formulasaun, diskusaun no ezekusaun instrumentu planeamentu estratéjiku munisipál. Aleinde ne’e, Konsellu Konsultivu Munisipál mós iha papél importante atu halo akompañamentu no avaliasaun ba prestasaun bens no servisu públiku, hodi asegura katak responde di’ak liu ba nesesidade sidadaun sira iha munisípiu.

Iha enkontru extraordináriu ida ne’e, ajenda prinsipál mak diskusaun kona-ba apresiasaun no aprovasaun Planu Investimentu Munisipál (PIM) ba tinan 2027. Dokumentu PIM konsidera hanesan instrumentu estratéjiku ida ne’ebé orienta prioridade investimentu iha munisípiu, inklui dezenvolvimentu infraestruturas, servisu básiku no programa sira ne’ebé fó impaktu direta ba moris povu nian.

Iha diskursu abertura, Sua Exelénsia Presidente Autoridade Munisipál Liquiçá, ne’ebé mós Prezidenti Konsellu Konsultivu Munisipál, hato’o katak enkontru extraordináriu ne’e sai momentu importante atu konsolida partisipasaun hotu-hotu iha prosesu planeamentu dezenvolvimentu munisipál.

“Ohin ita realiza enkontru extraordináriu ida ne’e atu diskute no halo apresiasaun kona-ba Planu Investimentu Munisipál (PIM) ba tinan 2027. Konsellu Konsultivu Munisipál hanesan orgaun ida ne’ebé iha papél prinsipál atu fó hanoin no orientasaun kona-ba prioridade investimentu iha munisípiu,” hateten Presidente.

Prezidente esplika katak PIM mak instrumentu estratéjiku ida ne’ebé determina diresaun projetu dezenvolvimentu sira iha tinan oin, ho objetivu atu kria kondisaun di’ak liu ba povu Liquiçá. Setor prioridade sira inklui edukasaun, saúde, infraestrutura, agrikultura no área relevante seluk sira ne’ebé kontribui ba bem-estar komunidade.

Iha oportunidade ne’e, nia subliña katak Konsellu Konsultivu Munisipál reprezenta komunidade tomak liu husi Xefi Suku sira no reprezentante ajente sosial sira. Sira nia kontribuisaun importante tebes atu hato’o aspirasaun no problema real husi komunidade, hanesan iha área edukasaun, bee no saneamentu, infraestrutura, agrikultura no servisu básiku seluk.

Depois hetan aprovasaun iha nivel munisípiu, dokumentu PIM sei submete ba ministériu relevante atu kontinua prosesu avaliasaun no diskusaun iha Konsellu Ministru hodi hetan aprovasaun final. Prosesu ida ne’e importante atu garante integrasaun entre planeamentu lokal no polítika nasional, no mós asegura legalidade formál ba implementasaun programa sira.

Iha parte ikus, Presidente hato’o katak prosesu preparasaun orsamentu ba tinan 2027 sei kontinua ho elaborasaun detallu liu tan iha fulan Agostu, tuir kalendáriu governu nian. Nia konvida membru hotu-hotu atu kontinua fó kontribuisaun ativa no konstrutiva iha prosesu ne’e.

“Ho kolaborasaun no partisipasaun hotu-hotu, ita bele asegura katak dezenvolvimentu iha Liquiçá la’o ho di’ak, inkluzivu no sustentavel ba gerasaun agora no futuru,” konklui Presidente.

Enkontru ne’e termina ho diskusaun produtivu no kompromisu husi membru sira atu kontinua servisu hamutuk hodi implementa planu ne’ebé aprova ba benefísiu komunidade tomak iha Munisípiu Liquiçá.

#MediaPortalLiquiçá

𝐍𝐎𝐓Í𝐒𝐈𝐀

𝕄𝕦𝕟𝕚𝕤í𝕡𝕚𝕦 𝕃𝕚𝕢𝕦𝕚çá

𝕃𝕠𝕣𝕠𝕟, 𝟙𝟡, 𝔽𝕦𝕝𝕒𝕟 𝕄𝕒𝕣𝕤𝕦, 𝕋𝕚𝕟𝕒𝕟 𝟚𝟘𝟚𝟞

𝐋𝐢𝐪𝐮𝐢çá – Membru sira husi Konsellu Koordenasaun Munisipál Liquiçá hala’o enkontru ordináriu ida ho fokus prinsipal ba aprovasaun ajenda estratéjiku rua ne’ebé konsidera importante tebes ba dezenvolvimentu iha nivel suku no komunidade, mak elaborasaun perfil suku no Planu Dezenvolvimentu Komunitáriu (PDK).

Enkontru ne’e prezide husi Presidente Autoridade Munisipál Liquiçá, Sua Exelénsia Paulino Ribeiro, M.PA, ne’ebé mos exerce knaar hanesan Presidente ba Konsellu Koordenasaun Munisipál. Atividade ne’e realiza tuir baze legal ne’ebé estabelese ona husi Governu, ho objetivu atu reforsa koordenasaun entre instituisaun sira no asegura planeamentu dezenvolvimentu ne’ebé efikaz no responde ba nesesidade komunidade.

Iha intervensaun ba enkontru ne’e, Sua Exelénsia Paulino Ribeiro hateten katak Membru konsellu sira halo ona aprovasaun kona ba asuntu rua ne’ebé sai prioridade estratéjiku ba dezenvolvimentu lokal iha tinan 2026.

Aprova ona asuntu importante rua, mak perfil suku no planu dezenvolvimentu komunitáriu (PDK), ne’ebé sei sai hanesan baze ba planeamentu no implementasaun programa sira iha nivel suku,” dehan PAM.

PAM esplika katak elaborasaun perfil suku presiza dadus ne’ebé klaru, kompletu no detalhadu kona-ba kondisaun báziku komunidade nian. Dadus hirak ne’e inklui númeru uma-kain sira ne’ebé asesu ba bee mos, kondisaun estrada husi suku ba suku no husi suku ba aldeia, inklui distánsia iha kilometru. Ho informasaun hirak ne’e, governu bele identifika progresu infrastrutura no determina área prioritária ne’ebé presiza intervensaun.

“Ho dadus ne’ebé detalhadu, ita bele hatene hira mak halo ona no hira mak seidauk halo, nune’e ita bele defini prioridade atu kontinua dezenvolvimentu,” hateten PAM.

Iha parte seluk, kona-ba Planu Dezenvolvimentu Komunitáriu (PDK), PAM subliña katak presiza iha dadus demografia suku ne’ebé kompletu no atualizadu. Dadus hirak ne’e inklui informasaun kona-ba númeru uma-kain sira ne’ebé hakiak animal no sira ne’ebé la hakiak animal, ne’ebé importante atu halo análize kona-ba kresimentu ekonomia lokal, liu-liu iha setor produtivu.

“Se dadus hirak ne’e laiha, ita sei susar atu hatene oinsa kresimentu ekonomia lokal lao, no oinsa ita bele fó apoiu ba komunidade atu aumenta produsaun no rendimentu,” klarifika PAM.

Iha oportunidade ne’e mos, Sua Exelénsia Paulino Ribeiro fó orientasaun ba diretóres sira, xefe suku no parseiru relevante hotu-hotu atu servisu ho responsabilidade no seriedade, hodi prepara-an ba mudansa importante iha tinan 2026, liu husi implementasaun politika desentralizasaun poder lokal.

Nia hateten katak ho implementasaun desentralizasaun ne’e, governu munisipál sei hetan responsabilidade boot liu iha jestaun rekursu no mobilizasaun fontes finansiamentu rasik atu sustenta dezenvolvimentu lokal.

“Ita tenke servisu makaas no iha vizaun, tanba ita rasik maka sei buka osan atu hatama ba kambra munisipál, hodi nune’e bele aumenta orsamentu husi governu sentral ka husi doador sira, atu depois bele implementa programa sira no aprezenta iha asembleia munisipál,” dehan PAM.

Partisipante sira iha enkontru mos fó apoiu tomak ba orientasaun ne’ebé fó ona no konkorda atu kontinua reforsa servisu iha área importante sira, hanesan:

• Hametin rekolha no atualizasaun dadus perfil suku

• Garante PDK bazeia ba evidénsia no nesesidade real komunidade

• Aumenta kapasidade lideransa lokal iha planeamentu no jestaun

• Prepara-an ho di’ak ba implementasaun desentralizasaun poder lokal.

Aleinde ne’e, enkontru ne’e mos sai hanesan espasu atu reforsa komunikasaun no koordenasaun entre diresaun munisipál sira, postu administrativu no lideransa suku, atu asegura katak programa dezenvolvimentu hotu-hotu bele implementa ho efisiénsia no transparénsia.

Ho aprovasaun ajenda estratéjiku ida ne’e, Konsellu Koordenasaun Munisipál Liquiçá hatudu nia komitmentu atu promove dezenvolvimentu inkluzivu no sustentável, ho baze ba dadus ne’ebé forte, planeamentu ne’ebé di’ak no koordenasaun ne’ebé efetivu entre nivel governasaun hotu-hotu, hodi hasa’e di’ak liu tan moris komunidade iha Munisípiu Liquiçá.

#media_portalliquiçá

https://www.facebook.com/share/p/175bHE4MA3

Liquiçá, 10 Marsu 2026 –

Reprezentante husi Presidente Autoridade Munisipál Liquiçá, Xefi Gabineti PAM Sr. Marcelino de Jesus Pereira, partisipa iha atividade reflorestasaun ho kuda au oan iha Suku Leorema, Aldeia Urema, Postu Administrativu Bazartete, Munisípiu Liquiçá.

Atividade kuda au oan ne’e fasilita husi Autoridade Proteksaun Civil (APC) Munisípiu Liquiçá ho kolaborasaun ho Institutu Bambu. Inisiativa ida ne’e halo ho objetivu atu proteje meiu ambiente, halo konservasaun ba floresta no prevene dezastre naturáis hanesan rai halai iha komunidade sira ne’ebé hela besik iha área risku iha Suku Leorema, liu-liu iha Aldeia Urema.

Iha biban ne’e, Xefi Gabineti ne’ebé reprezenta Presidente Autoridade Munisipál hateten katak atividade reflorestasaun ne’e importante tebes atu hatur fila fali natureza hanesan uluk. Nia esplika katak mudansa klimátika halo ita nia rai hasoru konsekuénsia oioin, inklui rai halai iha fatin barak, tanba ne’e presiza halo esforsu hamutuk atu kuda au no restaura ambiente.

“Loron ohin ita hamutuk kuda au oan iha ita nia rai ho esperansa katak au oan sira ne’ebé ita kuda la’ós formalidade deit, maibé loron ida sei fó benefísiu barak ba ita hotu. Au sira iha funsaun importante atu prezerva natureza, kuida rai, no fó mos valor ekonomia ba komunidade,” hateten Sr. Marcelino.

Nia mos enfatiza katak governu no autoridade lokal mesak la bele halo servisu hotu-hotu, tanba ne’e presiza kooperasaun husi instituisaun sira no komunidade. Tanba ne’e, nia agradese no apresia ba Autoridade Proteksaun Civil ne’ebé koordena atividade ida ne’e hamutuk ho Institutu Bambu ne’ebé fornese au oan atu kuda iha área refere.

Xefi Gabinete akresenta  tan katak, Au sira ne’ebé ita kuda nain mak ita rasik, no ita mak tenke kuida didiak atu iha futuru ita bele goza nia rezultadu,

Atividade reflorestasaun ida ne’e hetan partisipasaun husi reprezentante Autoridade Munisipál Liquiçá, Xefi Gabineti PAM, Komandante Autoridade Proteksaun Civil, Diretor Ezekutivu Institutu Bambu, reprezentante Direção Dezastre Naturál, reprezentante APA Bazartete, Xefe Suku Leorema, Adjuntu Diretor Eskola Tékniku Vokasionál Leorema, estudante sira no komunidade lokal.

Ho realizasaun atividade ida ne’e, espera katak komunidade bele aumenta tan konsiénsia kona-ba importánsia proteje meiu ambiente, konserva floresta no prevene dezastre naturáis hodi garante sustentabilidade ba gerasaun ohin no futuru.

https://www.facebook.com/share/p/1AmcyLDcQG

LIQUIÇÁ, Quarta-Feira, 04 Marsu 2026

Presidente Autoridade Munisipál Liquiçá, Sua Exelénsia Paulino Ribeiro, M.PA, partisipa iha Serimónia Abertura Ofisiál Formasaun no Asisténsia Téknika ba Kargu Dirijente Autoridade Munisipál no Postu Administrativu sira, ne’ebé hala’o iha Salaun Enkontru Autoridade Munisipál Liquiçá durante loron tolu, hahú husi loron 04 to’o 06 fulan Marsu. Atividade formasaun ida-ne’e fasilita husi INAP.

Serimónia abertura ne’e ofisialmente loke husi Ministério da Administração Estatal, liuhusi Diretór Jerál Desentralizasaun no Governu Lokál, António Augusto Guterres, hanesan parte husi implementasaun planu formasaun no asisténsia téknika ba tinan 2026.

Formasaun ne’e lori tema: “Kontinua Haforsa Estrutura Munisipál liu husi Kapasitasaun”, ho objetivu atu reforça kapasidade lideransa, jestaun administrativa no koñesimentu tékniku dirijente sira, hodi asegura katak estrutura munisipál bele funsiona ho efisiénsia, transparénsia no responsabilidade.

Iha nia intervensaun, Diretór Jerál Desentralizasaun no Governu Lokál esplika katak inisiativa ida-ne’e reflete Governu Sentrál nia kompromisu atu kontinua fó apoiu no asisténsia ba autoridade munisípiu sira, bazeia ba Dekretu-Lei N.º 34/2025, 15 Outubru, ne’ebé halo Sexta Alterasaun ba Dekretu-Lei N.º 3/2016, 16 Marsu, kona-ba Estatutu Administrasaun Munisipál, Autoridade Munisipál no Grupu Tékniku Interministerial ba Desentralizasaun Administrativa.

Nune’e mós, formasaun ne’e tuir orientasaun husi Rezolusaun Governu N.º 6/2025, 10 Fevereiru, kona-ba ezekusaun Estratéjia Desentralizasaun Administrativa no Instalasaun Órgaun Reprezentativu Poder Lokál 2025–2028. Nia enfatiza katak prioridade ba tinan ida-ne’e maka investe iha formasaun no kapasitasaun funsionáriu munisipál sira to’o tinan 2026, hanesan preparasaun atu kumpre kondisaun mínimu ne’ebé ezije iha prosesu avaliasaun.

Tamba ne’e, nia husu ba Autoridade Munisipál Liquiçá atu kontinua esforsu no servisu hamutuk, tanba iha fulan Juñu sei hala’o fali avaliasaun ba Munisípiu Liquiçá hodi haree prontidaun ba eleisaun Poder Lokál.

Formasaun ba Kargu Xefia sira hala’o durante loron tolu, hahú husi loron 04 to’o 06 fulan Marsu 2026, no formasaun ba tékniku administrativu sira mós hala’o iha períodu hanesan. Matéria sira ne’ebé aborda inklui jestaun administrasaun públika, planeamentu estratéjiku, jestaun finansas munisipál, prosedimentu administrativu no mekanizmu koordinasaun interinstitusionál.

Serimónia abertura ne’e hetan mós partisipasaun husi Diretór Nasionál sira, Administradór Postu Administrativu Ataúro, Sekretáriu Munisipál husi Ermera, Baucau, Bobonaro no Covalima, inklui mós diretór servisu munisipál no xefe departamentu sira.

Presensa representante husi munisípiu sira seluk hatudu kooperasaun no komitmentu hamutuk atu susesu implementasaun desentralizasaun administrativa iha rai-laran.

Iha biban ida-ne’e, Prezidente Autoridade Munisipál Liquiçá, Sua Exelénsia Paulino Ribeiro, hanesan uma-na’in, agradese tebes ba Ministériu Administrasaun Estatal tamba hili Munisípiu Liquiçá nu’udar fatin dahuluk ba realizasaun atividade formasaun ida-ne’e. Nia hatete katak formasaun ne’e importante tebes atu aumenta koñesimentu no kompeténsia diretór no xefe departamentu sira, liu-liu iha área tékniku no jestaun administrativa.

Nia mos reafirma katak ho apoiu husi MAE no INAP, Munisípiu Liquiçá sei kontinua prepara an atu hakat ba implementasaun Poder Lokál ho governasaun ida-ne’ebé di’ak, transparente no responsavel. “Ami fiar katak ho formasaun ida-ne’e, ami bele jere administrasaun munisipál ho di’ak liu tan no fó servisu ne’ebé efikás ba povu,” hatete PAM Liquiçá.

Ho realizasaun atividade ida-ne’e, Autoridade Munisipál Liquiçá reafirma nia komitmentu atu eleva dirijente sira nia koñesimentu profisionál no kapasidade lideransa, hodi garante prestasaun servisu públiku ne’ebé di’ak liu tan ba komunidade no kontribui ba dezenvolvimentu sustentável Munisípiu Liquiçá.

Media Portal Munisipal Liquica

𝐍𝐎𝐓Í𝐒𝐈𝐀 𝐎𝐅𝐈𝐒𝐈Á𝐋 Portal Munisipal Liquica

𝐋𝐢𝐪𝐮𝐢ç𝐚, – 𝐋𝐨𝐫𝐨𝐧 24, 𝐅𝐮𝐥𝐚𝐧 𝐅𝐞𝐯𝐞𝐫𝐞𝐢𝐫𝐮, 𝐓𝐢𝐧𝐚𝐧 2026

Munisípiu Liquiça hetan ona vizita ofisiál husi Sua Exelénsia Primeiru-Ministru Kay Rala Xanana Gusmão ho objetivu atu hare’e diretamente funsionamentu Servisu Munisipál sira no halo avaliasaun kona-ba implementasaun servisu públiku, inklui verifika kondisaun mínimu Munisipál nian hanesan preparasaun importante ba implementasaun Poder Lokál iha futuru.

Vizita refere realiza iha Salaun Tokodede Center, ne’ebé simu ho solene husi Presidente Autoridade Munisipál Liquiça ho nia ekipa, membru Governu sira, lideransa lokal no komunidade sira.

Iha eventu importante ne’e, Presidente Autoridade Munisipál Liquiça halo aprezentasaun kompletu kona-ba progresu, planeamentu no prioridade dezenvolvimentu Munisipál, ne’ebé inklui:

1. Rezultadu Servisu Munisipais,

Aprezenta rezultadu husi 19 servisu Munisipais sira ne’ebé durante ne’e implementa ona hodi hasa’e qualidade prestasaun servisu públiku.

2. Planu Estratéjiku Munisipál

Inklui:

• Planu Dezenvolvimentu Munisipál (PDM) 2026–2030

• Plano Estratéjiku Dezenvolvimentu Munisipál

Ne’e sai hanesan matadalan importante ba dezenvolvimentu sustentavel Munisipiu.

3. Estrutura Funsionamentu Autoridade Munisipál

Esplika kona-ba estrutura organizativa no sistema funsionamentu Autoridade Munisipál hodi asegura governasaun ne’ebé efisiente.

4. Planeamentu no Orsamentu Munisipál

Inklui:

• Planu Asaun Anual

• Sistema Orsamentu no Aprovizionamentu

• Implementasaun programa Merenda Eskolar, Saúde no Agrikultura

5. Planu Investimentu Munisipál

Apresenta implementasaun programa sira hanesan:

• PDIM (2023–2026)

• PNDS (2023–2026)

• Sorumutu intergradu iha nivel Aldeia no Suku hodi determina prioridade investimentu

• Runiaun Konsellu Koordenasaun Postu no Munisipiu

6. Apoiu Tékniku no Formasaun

Inclui:

• Planu formasaun ba funsionáriu sira

• Apoiu tékniku ba Gabinete Presidente Autoridade Munisipál

7. Atendementu Públiku no Digitalizasaun

Inklui:

• Servisu Balkaun Úniku (BI, Pasaporte, Registu Kriminal, Sertidaun no seluk tan)

• Sistema SIIGSA hodi gere registu administrativu iha nivel Suku

Iha Sua Exelénsia Primeiru-Ministru nia diskursu hato’o katak Munisipiu sira iha papel importante teb-tebes iha dezenvolvimentu nasaun no preparasaun Poder Lokál.Primeiru-Ministru mos husu ba lideransa lokal, funsionáriu sira no komunidade atu:

• Hametin servisu hamutuk entre Governu no povu

• Aumenta responsabilidade no transparénsia iha servisu públiku

• Prioriza dezenvolvimentu ne’ebé responde ba nesesidade povu nian.

• Prepara Munisipiu ho di’ak hodi simu Poder Lokál iha futuru

PM mos enfatiza katak dezenvolvimentu Munisipiu depende ba kooperasaun entre Governu, lideransa lokal no komunidade tomak.

Depois remata aprezentasaun, Primeiru-Ministru, akompaña husi Presidente Autoridade Munisipál Liquiça no ekipa nasional sira, halo vizita direta ba projetu importante sira inklui:

• Projetu Turizmu Komunitária

• Instituisaun Eskola sira

• Projetu dezenvolvimentu seluk iha Munisipiu

Vizita ofisiál ne’e marka mos prezensa husi Membru Governu sira, F-FDTL no PNTL, Veteranos sira, Asosiasaun sira, Xefi Suku 23 no Xefi Aldeia sira, Estrutura Munisipál tomak, Komunidade no estudante sira.

Vizita ofisiál ida ne’e konsidera hanesan pasu importante hodi Reforsa koordenasaun entre Governu Sentral no Munisipiu, Avalia preparasaun implementasaun Poder Lokál, Hasa’e qualidade servisu públiku no Promove dezenvolvimentu sustentavel iha Munisípiu Liquiça.

#media_portalliquiçá

KONSELLU KONSULTIVU MUNISIPÁL LIQUIÇÁ

Liquiçá, Loron 20, Fulan Fevereiru, Tinan 2026

Presidente Konsellu Konsultivu Munisipál Liquiçá realiza Enkontru Extra Ordináriu iha loron Sexta-Feira, 20 Fulan Fevereiru Tinan 2026, oras tuku 08:00 otl, iha Salaun Enkontru Autoridade Munisipál Liquiçá, Suku Maumeta, Munisípiu Liquiçá.

Enkontru ne’e realiza ho objetivu atu asegura no garante funsionamentu di’ak Konsellu Konsultivu Munisipál nudar plataforma importante ida hodi promove partisipasaun husi ajente sosiál, lideransa komunitária, no forsa ativa lokál sira iha prosesu formulasaun, diskusaun no ezekusaun instrumentu planeamentu estratéjiku Autoridade Munisipál. Liu husi enkontru ida ne’e mos, Konsellu Konsultivu Munisipál hala’o papel importante iha prosesu akompañamentu no avaliasaun prestasaun bens no servisu públiku, atu nune’e bele responde di’ak liu tan nesesidade no interese povu iha Munisípiu Liquiçá.

Enkontru Extra Ordináriu ne’e partisipa husi membru sira Konsellu Konsultivu Munisipál, lideransa institusionál relevante, reprezentante entidade governamentál no naun governamentál, no mos reprezentante sosiadade sivíl iha Munisípiu Liquiçá.

Iha enkontru refere, agenda prinsipál sira mak hanesan:

Presidente Konsellu Konsultivu Munisipál fo pose ofisiál ba membru Konsellu Konsultivu foun na’in ida ba períodu mandatu 2026–2028, nudar parte husi esforsu atu hametin estrutura no kapasidade funsionamentu Konsellu Konsultivu Munisipál.

ealiza diskusaun, apresiasaun no aprovasaun ba proposta eroi Nasiónal ida ne’ebé sei utiliza nia naran atu hari’i konstrusaun rotunda iha área Tibar. Proposta ne’e konsidera hanesan forma ida hodi valoriza no homenaje kontribuisaun eroi Nasiónal sira ba luta libertasaun no dezenvolvimentu nasaun, no mos atu hametin identidade istórika no patriotizmu iha sosiedade.

Iha oportunidade ne’e, Presidente Konsellu Konsultivu Munisipál hato’o apresiasaun ba membru sira hotu tanba sira nia prezensa no kontribuisaun iha enkontru ne’e, no husu atu kontinua hametin koordenasaun, kolaborasaun no partisipasaun ativa hodi apoia dezenvolvimentu sustentavel iha Munisípiu Liquiçá.

Ho realiza enkontru ida ne’e, hein katak Konsellu Konsultivu Munisipál bele kontinua hala’o nia knaar ho efetivu liu tan, nune’e bele asegura planeamentu ne’ebé inkluzivu, transparante no responde ba nesesidade povu, atu hasa’e liu tan kualidade servisu públiku no bem-estar komunidade iha Munisípiu Liquiçá.